13匹英愛新馬周六抵港　賀賢首度引進岳伯仁貨源

最新一批為數13匹嘅英愛新馬，將會响打完風之後呢個周末抵港，當中自購馬分別有3匹來自英國，與及7匹來自愛爾蘭，自購新馬3匹，1匹來自英國同埋2匹來自愛爾蘭。

由於今次自購馬為數佔咗10匹，自然要睇吓會唔會有啲揀手貨，近兩季成為人氣指數最高嘅岳伯仁貨源，又點會少佢份，今次有匹已故「天文學家」末代子嗣「行動綱領」(Agenda)，至今4戰1冠1亞季，唯一敗仗就係上次挑機皇家雅士谷，出戰G2英皇愛德華七世錦標跑第7，以呢匹馬已經向長途發展之馬，睇嚟又係部署新季搶分跑打吡嘅揀手貨。

方嘉柏呢一水就响大馬主阿加汗度搜羅到「常為你」(Sharinay)，呢匹响愛爾蘭上陣馬匹，至今4戰2冠1亞，雖然頭馬並唔係分級賽水平，但响呢啲名牌入貨，身價當然不菲。

大馬主黃志祥，响今次有兩匹响當地已經係佢名下嘅PP一齊運港，分別來自英國，隸屬沈集成「最重要」(Matters Most)，另一匹來自愛爾蘭，隸屬告東尼旗下Arnaman。