【變出彩虹】今季好多馬房未必敢再歎慢板？

新一季唔少馬房猶其中下游一群，相信心態上都唔會太歎慢板，始終早段大脫腳，一來馬房士氣會下跌，愈愈輸無信心就弊，二來若然有個別馬主唔耐煩拉倉，隨時引起骨牌效應，此險非不已冒不得。當然有部分細馬房想搏亦力不從心，但有部分則有能力爭取盡早開胡，好似葉楚航開鑼日出戰第4場四班田草1000米的新勝馬「舉步生風」，賽前做足工夫多番拍跳兼贏大閘，跑番贏馬路程又繼續用潘頓，心意應是想幫馬房開齋了，「舉步生風」上季初出在兩匹快馬「輗多福」及「不可擋」狂放下跟第3位，最後300米發力透出輕勝，時速與姿態都可觀，今次雖然加到135磅，但睇部署航哥會咬牙切齒再搏，各位信就買跑，或者用來W過關亦不致太乏味。●靈駿