蕭家新季王牌　米奇評76分起步

早前運港嘅一批為數20匹自購馬，日前就獲得評分編班，其中最矚目，當然係蕭家軍視為4歲馬大賽希望嘅「米奇」，呢匹應屆大不列顛錦標得主，來港後評76分起步，比起上季來港嘅另一匹未跑先傷嘅名氣自購馬「惠比壽」，以G3漢普頓宮錦標得主來港評84分，前駒以較低分數起步有着數，大家不妨拭目以待。

不過，「米奇」喺呢批新馬之中未算係評分最高。K085隸屬伍鵬志，又係出自岳伯仁貨源，曾以「大學城」(Cambridge)嘅譯名出戰皇家雅士谷嘅金門錦標得第2，獲評78分。呢匹馬於英愛6戰取得1冠2亞1季，最佳成績就曾經喺二級賽東帝錦標跑第4，來港後將會披上「包裝」系綵衣服役。

兩匹名氣自購馬，分別來自香港兩大馬主陣營，目標一致以4歲經典賽事系列進發，如今已經投入操練，睇嚟都會趕及喺年底前開上前線。