雄心壯志　歌利巨人向日本盃進發

今年爆冷勇奪英皇錦標嘅法國賽駒「歌利巨人」(Goliath)，一躍而成為歐洲頂流長途賽駒，新一輪嘅國際評分仲未公布，但預計新勝國際錦標嘅「名戰古城」，將會取代前駒，成為草地組別嘅長途一哥，而「歌利巨人」贏完英皇錦標之後，就遲遲仲未有動靜。

日前「歌利巨人」馬主股東之一嘅Philip Baron von Ullmann就透露，「歌利巨人」已經鎖定今年目標，由於係閹馬身分，無緣出戰今年嘅法國凱旋門大賽，不過佢哋亦都放棄埋英國冠軍錦標，取而代之，搵番啲相同級數嘅世界大賽，將會以日本盃為年終目標。

至於鎖定日本盃為目標，除了地位被認同之外，賽制亦都相當吸引，即使於日本盃落敗，參賽馬匹亦起碼有30萬美元進賬，更遑論能夠成為王者，獎金收入更加可觀。

出戰日本盃之前，「歌利巨人」就會先喺9月22日復出熱身，出戰德國科隆馬場舉行嘅歐洲大賽，配搭自然係英皇錦標嘅贏馬功臣蘇銘倫。