森仔一早仄準　今季隨時變身蟲變龍

從化馬場試草地大閘，10個騎師漏夜上咗去開工，包括蔡明紹，班德禮，霍宏聲，楊明綸，鍾易禮，艾道拿，巴度，艾兆禮，周俊樂及潘明輝，預早估計今朝沙田馬場會十分淡靜，幸好仲有希威森，田泰安同埋潘頓幫到手，留守大本營繼續操馬，氣氛也不至於太過沉悶。

重點鏡頭有呂健威馬房列陣第5場四班1400米件「百勝威龍」出試過程，希威森操刀快試兩段，走勢饒有火氣，人馬首度合作，騎者交足功課十分重視，於月初已親自上從化替此駒試閘，一早摸熟馬兒脾性，備戰工夫一絲不苟。

威哥在烽火台督操期間，與副練薛順強好似孖公仔咁款睇到好肉緊，練者更親自打表紀錄時間，事後顯得甚為滿意。

咪睇「百勝威龍」上季3仗無乜料到，當時未太成熟且天氣不穩定經常落大雨跑黏軟地，發揮水準有限，如今不斷成長，場地變番正常，質新份子隨時可變身演出。