金鎗六十退役　潘頓田泰安有話兒

3屆香港馬王「金鎗六十」馬主陳家樑、練馬師呂健威、騎師何澤堯今日下午會見傳媒，公布馬王退役事宜。潘頓及田泰安今早受訪時被問到對「金鎗六十」退役嘅感受，兩位騎師不約而同話「金鎗六十」嘅戰績，將會被香港馬圈上下懷念。

潘頓指「金鎗六十」係一匹會令人心碎嘅對手，他說：「每次上場前，你知道自己最多只會跑第2。『金鎗六十』有好強嘅鬥心，爆發力強勁，跑法彈性，係我喺香港從騎以來見過最好嘅賽駒，好彩我都贏過『金鎗六十』幾次。如果要用一個字形容『金鎗六十』，一定係冠軍！」

田泰安就話可以見證到「金鎗六十」係一件美好嘅事，他說：「每個騎師都想喺策騎生涯遇到一隻好似『金鎗六十』咁強嘅賽駒。『金鎗六十』鼓舞到好多香港人，有好多粉絲，相信我哋都唔會再見到咁優秀嘅佳駟。『金鎗六十』係好難應付嘅對手，仲記得當時策騎『浪漫勇士』出戰香港金盃，最後100米我以為贏得，點知就畀『金鎗六十』追過。」