老友停賽在即　蘇偉賢變招助開齋

跑了3期賽事，經已有湯普新、楊明綸、董明朗同周俊樂被罰停賽，除了後者已獲2W，其他都仍未開齋，都咪話唔急，至於跑罷周三谷戰便要停賽一期的楊明綸，今早知恥近乎勇，5點左右便現身晨課，一口氣連操3匹參戰馬，分別「神行百變」、「樂捉鳥」及「競駿天下」，坐騎來自3位前領練馬師蘇偉賢、沈集成同希斯，且看有貴人相助，阿綸能否趕及停賽前開到齋？

然而，上季與阿綸合作無間，且取得不俗成績的蘇偉賢，今早特登企出烽火台外面，近觀「神行百變」由騎者快跳考驗，重視之情不言而喻，即使此駒在港10戰全負，惟近3戰已愈輸愈近，有兩次更能跑入獎金名次，顯然五班漸見有利，而此駒月初戴羊毛面箍試咗課泥閘，在阿綸胯下輕鬆撲上第2，今戰CP1絕對係有備而來，加上經過暑期洗禮，評分更落到26分新低，今戰只需負121磅，可期反彈！