【獨門秘技】周三夜賽「福星」高照

周三賽事竟然有4個馬房無報名，認真少見，第6場香港鄉村俱樂部盃，季內首場1800米賽事，長途點都係熱過身好啲，全場只兩駒季內跑過，「小神仙」上周三季內初出谷草一哩，沿途包尾追回第7名，只輸3個多馬位，增程而來直覺上一定更啱追，但過往跑一哩以上最叻第5名。

至於另一駒匆出為「皇仁福星」，谷草一哩專家跑過一次同程，放到埋門轉弱第5名輸兩馬位，走勢不差，上周三初出與「小神仙」同場，早段竟不夠快只能守中游位置，末段徐徐上前得第4只輸兩個半馬位，均速馬有可能今季要向更長路程發展，以其一貫忠心演出，加上跑法較機動，機會應比「小神仙」稍秤先。■西門獨