不甘做二奶王　韋達同命運對着幹

開季至今已跑完3個回合，為免夜長夢多，大家都想先發制人，暫時只得6位練馬師未開胡，當中韋達獲得4次亞軍，可謂一枝獨秀，爭勝決心愈趨熾熱，難怪練者一連兩朝都對明晚谷戰旗下的參戰馬操練甚表着緊，擺明心中有馬。

今早為賽前加課期，韋達向來一睇就睇晒幾隻，惟今勻卻第一時間只安排出戰頭場的「新幹線」由助手在內圈踱步，集中火力吼實此駒，課後亦連隨趕返機坪接馬，重視之情表露無遺，需知「新幹線」上季不是屢次遇上變化地，就是受到檔位而影響發揮，並經常所負不遠，今戰回爭首本谷中1200米，而4檔亦係贏馬檔位，集有利條件於一身，不拼何待？