【晨課起筷馬】力磨冒勇 三班留佢唔住

第5場三班1650米，希廐「久久為攻」在港4捷，贏馬最高評分都係評62分，表面上實力係咁多料，不過上季尾一連4仗闖入三甲，均負於實力非等閒對手，伸算「久久為攻」本身已悄悄有突破。

今季開操後，「久久為攻」狀態並唔係迅速冒升，因此，幕後亦刻意安排辣操對待，8月尾起一連4課拍跳打磨空前積極，8月30日拍「喜勝威龍」、「環球英雄」跳800米，「久久為攻」留前試後，直路末段內欄竄上，姿態點到即止；9月2日彈草閘拍「環球英雄」及「錢多多」，「久久為攻」早段落後，但半程走順後即加速竄上拍實廐侶，快慢由人，相當受控。

到9月初，「久久為攻」安排試番課田泥1200米閘，由田泰安主轡，起步反應迅速，不過鞍上人刻意拖番實，沿途外疊望空之下早段墮至尾疊，成條直路鞍上人都冇催策動作，但馬匹主動增速，逐步逼近之下以第5名過終點，姿態不比身旁力騎嘅「將義」遜色，勇態已備。

■陳志懷