【場地點樣】跑馬地追月夜賽　今晚預測跑好地

今晚中秋紅假追月夜，跑馬地馬場繼續馬照跑，共編8場草地賽事，以移欄B跑道進行角逐，頭場開跑時間為晚上7時10分。

就今晨勘察場地之後，掛牌「好地」，度地儀指數為2.72。開季首次谷草夜賽，場地情況理想，充分發揮A欄賽事大利前置型馬匹，8場賽果只得一匹「江南勇士」，受惠於有利形勢下可以後上贏馬，今晚跑B欄，是否一樣大利跑法主動馬，不過以B欄歷來較利追趕之跑道特色，就以上季初第2次於B欄競逐之谷草夜賽，中置後上馬匹卻成為賽果主流，揀馬範圍更具彈性。

先整理番上季谷草B欄賽果，騎師成績雖然都係潘頓、田泰安同布文主導，但響排名方面就有變動，布文響3位之中出馬最少，但成績最好贏咗12W，亦係命中率最高騎師，以佢今晚同方嘉柏嘅合作，值得優先憧憬。

尚有2位值得留意嘅華將，分別係響上季B欄取得8W同7W嘅鍾易禮與蔡明紹，尤其係後者，佢同布文情況雷同，都係響B欄跑得少而贏得多嘅騎師，新季開頭好手風正順，亦可視為今晚賽事嘅投注指標。