【最後一屆】馬定賢想贏新加坡金盃寫下歷史！

今個星期六(10月5日)將會係新加坡賽馬公會營運嘅最後一日，新加坡賽馬歷史悠長，現時結束營運，難免令人感到惋惜。即管如此，但當地部分騎練亦都留守至最後一日，希望可以喺呢片土地劃上完美句號。

新加坡克蘭芝馬場，於本周六將上演2000米新加坡一級賽，新加坡金盃。當地練馬師之一摩西兩星期前已決定安排「金猴」退出金盃，除咗因為「金猴」跑2000米嫌長之外，亦都係因為想趕及喺12月中可於澳洲重新訓練，所以就唔跑呢場賽事。

另外，馬定賢近年訓練「林家」系賽駒亦都取得優秀成績，曾練出「林家閃電」、「林家準將」贏新加坡金盃，最後一屆新加坡金盃，佢就雙龍出海，派遣「林家準將」同「林家灑脫」上陣，馬定賢認為，呢場已經係最後一屆新加坡重要大賽，邊個贏馬邊個就可以寫下歷史，自己當然想夥拍「林家準將」一齊贏得呢場大賽。

馬定賢明白到重磅或會影響「林家準將」發揮，自己覺得同場「林家灑脫」係佢最大威脅，但兩駒難分高低，希望其中一駒都可以爭取勝利。