前季爆過15倍冷W　忠心分子退役了

除了實力超級的佳駟，戰意好的忠心馬，一樣值得尊重。

今日有4駒公布退役，其中正有7歲忠心分子「勇眼光」。此駒歷來46戰獲3W17P，乃忠心低班鐵馬，睇番暑期8月中開始停操，所以今季都未有再安排上陣。「眼光」系馬眾多，一時忘記哪一匹？前季曾配嘉里在谷草1200米爆出15倍冷W，可會即刻記得？

蔡廐「色種笑」則在前季配莫雅及潘頓取下2w，但跑至季尾驗出流鼻血，而上季只上陣1次，練馬師同馬主都畀足耐性。早前從化試閘不差，今季復出泥戰大敗後，昨日尾場跑田草1400米，搶放下最後只輸5個多馬位，可惜賽後驗出第2度流鼻血，被迫退役。

另外兩匹賀廐「悠悠我心」同容廐「綫路通明」都屬三零部隊，也在今日公布退役。