【獨門秘技】廖康銘部署夠「勁」

廖康銘之前贏「上校」省靚招牌，上季都係贏五班，今季8歲熱身一仗後可贏四班賽，到剛戰「國大合」之前四班10戰全敗，結果又取得突破，最重要兩駒埋門都落飛。而剛戰新勝的「有你有我」，路程配搭一樣且只多負4磅，但埋門回飛至8.5倍，結果落敗而回，練者計算精確，開倉一季多已熟知本地馬圈環境。

周日廖廐雖然只得3駒報名，但五班1400米的「超勁火力」要留意，在港12匹同父系馬，11匹仍在服役而4駒未出賽，只「江南勇士」曾勝谷草一哩，再睇「超勁火力」母線及身形，都係宜跑中長途，故之前集中跑短途而有接近走勢已算不差，1400米上季跑過一次，跟跑而回但只得11倍，再出返短途竟然70倍，顯然在馬房心中亦早認定為中距離馬，故今戰首落五班增程而來，臨場有風吹草動便要小心。■西門獨