華禮納幫川河系贏澳洲G1！

「川河」系馬主何家駒近年於世界各地都有養馬，佢除咗會讓自己名下嘅賽駒由澳洲運嚟香港服役，亦會安排部分喺歐洲上陣嘅中長途馬轉往澳洲發展，其中一匹就係曾於英國皇家雅士谷賽期嘅英皇佐治五世錦標得第7名嘅「川河陸駒」，今年轉往澳洲發展並加盟華禮納馬房，可惜一直未能交出頭馬。

不過，「川河陸駒」今日喺蘭域馬場上陣，角逐2400米一級賽大都會錦標，入直路後同高多芬名下嘅「金刺繡」(Zardozi)形成單打獨鬥之局，結果前駒喺騎師鍾賢哲胯下險勝，更為鞍上人帶來首場G1頭馬，即使賽後「金刺繡」騎師勞樑棟提出抗議，最終維持原判。

對「川河陸駒」嚟講，今次順利贏出一級賽，除了證明轉戰澳洲嘅部署係啱，亦好大機會令佢入圍今屆墨爾本盃。