事先張揚急流勇退　歐洲灰獸玩埋今年退役

今年進身成為歐洲頂級一哩精英嘅「卓倫谷」(Charyn)，大馬主Nurlan Bizakov以其名Sumbe賽馬集團名義，日前宣布愛駒嚟緊最新動向，跑埋今年嘅目標賽事之後，就會宣布退役，明年轉5歲將會響法國Haras de Montfort & Préaux牧場，投身成為種馬行列。

「卓倫谷」今季表現出色，亦成為蘇兆輝重返英國馬圈嘅代表作，人馬今季合作6次，取得4冠2亞驕人戰績，包括成為女皇安妮錦標同傑克莫華大賽雙料G1得主，可惜上場響隆尚磨坊大賽未竟全功，不敵「本族主義」跑第2。

據馬主方面透露，「卓倫谷」當然唔會錯過嚟緊英國馬季煞科戰，將會劍指1600米G1女皇利沙白二世錦標，然後就會遠征跑多場，將會響11月美國育馬者盃草地一哩大賽，或者係響日本京都競馬場舉行嘅一哩冠軍賽，二者任擇其一作為告別戰。