情傾日本　神鵰俠侶連續3年重臨客串

眨吓眼歐洲馬季接近尾聲，又有唔少好手趁住歇冬期搵落腳地客串，依家日本已經取代咗香港，成為英法騎師客串熱點。根據日本方面報道，馬昆同杜苑欣呢對神鵰俠侶，將會率先取得客串席位，11月再喺日本同馬迷見面。

今次重臨舊地，已經係佢哋兩個，連續3年喺JRA客串，暫定完成美國育馬者盃賽期後，跟住飛去日本履新，有效期係由11月9日起，直至12月底，接近兩個月時間。

雖然馬昆同杜苑欣，一直都係香港賽馬會爭相邀請客串對象，不過兩位似乎只限於國際賽檔期嚟湊熱鬧，跑吓騎師賽或出戰香港國際賽，對於較長時間嘅客串，佢哋異口同聲，只鍾意喺日本客串。

此外，另一位曾喺澳門發展嘅顧偉樂，早前新加坡跑完壓軸賽事之後，又再轉戰日本，而佢就再獲NAR地方馬會成功發牌，有效期由10月14日至12月6日，今次亦係佢第3次於地方馬會客串，並將會為大井練馬師藤田輝信效力，屆時又可以與法國鄉里麥晴欣同場競技。