390萬買返嚟　長跑好手變有誰共鳴

鄭俊偉近年得到「友瑩」系馬主楊毅同一眾老友葉思貝、許坤華嘅支持，都將唔少團體馬擺喺鄭廐，聽日第9場三班田草1600米就有楊生、許生有份嘅會心微笑團體名下馬「有誰共鳴」首度登場，呢匹4歲澳洲自購馬來頭絕不簡單，隨時可能係米高哥今季嘅打吡籌碼。

如果有留意海外賽事嘅馬迷，或者對「有誰共鳴」有啲印象，因為此駒曾以馬會譯名「長跑好手」出戰2500米一級賽維多利亞打吡，結果取得第4名，落後冠軍「精華沖天」3個幾馬位，而此駒亦試過喺2200米表列賽智朗經典賽得季軍，擺明係一匹有級數嘅長途馬。

不過，「長跑好手」上手馬主決定將此駒放網上拍賣，結果畀楊毅同埋一間賽馬顧問公司以75萬澳元(390萬港元)引入，兼且擺喺鄭俊偉馬房，全力支持米高哥，並改名為「有誰共鳴」。另外，此駒今年2月已經嚟咗香港，但5月尾卻運咗上從化放草，7月尾先返嚟香港，今次試咗兩課閘先跑，睇吓能否交出好成績。