唔止覺士盾　玉龍系高價貨想挑戰香港盃？

中國大馬主張月勝嘅玉龍集團，現時喺全球馬圈有一定影響力，不論喺歐洲抑或澳洲均擴大版圖，而今個禮拜六舉行嘅2040米G1覺士盾，玉龍集團旗下嘅「精緻之道」(Via Sistina)就係熱門之一，玉龍集團去年尾以540萬澳元(約2813萬港元)喺達德素12月拍賣會購入呢匹6歲馬女，並運去澳洲發展，交由華禮納訓練，取得美滿佳績，先後贏咗蘭威錦標、雲絲仙子錦標及東寶錦標3場一級賽，嚟緊就會出戰覺士盾，與日本代表「先見」、去年亞軍「樂觀派」(Mr Brightside)一較高下。

不過，據玉龍集團賽馬經理人Vin Cox透露，「精緻之道」完成覺士盾後，有機會繼續上陣，但初步睇嚟再增程跑墨爾本盃嘅機會唔大，反而報咗名參與年尾嘅香港國際賽，目標係香港盃，故此會考慮來港遠征。如果「精緻之道」真係嚟香港，到時就會面對香港馬王「浪漫勇士」，應該有一番龍爭虎鬥。