蔡明紹無事可入紙　仲有7匹坐騎添

季初成績唔錯嘅本地薑蔡明紹，尋日就憑廖康銘嘅「超風速」攞到季內第8W，以為順風順水，點知尾場為廖廐初出馬「九因歌」效力，去到800米處疑似踢到「誠好運」嘅後蹄失去平衡，結果將佢拋咗落嚟，兼且立即送往醫院接受進一步觀察，情況令人擔心。慶幸馬會其後透露蔡明紹並冇骨裂或其他嚴重受傷，只係未知可唔可以入紙參與周三嘅沙田泥地夜賽。

今朝馬會公布排位，蔡明紹榜上有無，兼且有7匹坐騎，相信佢傷勢唔算嚴重，而佢今次坐騎實力唔差，難怪只要身體情況許可，佢都想入紙繼續騎啦。其中尾場三班泥地1200米嘅「大老撾」，上仗正正喺佢胯下贏1000米直路賽，擊敗「寰宇豐采」同埋「舉步生風」，即使今次轉場初跑泥地1200米，但近兩次試泥閘都贏晒，反映轉場唔係無根據。

至於同樣出自巫偉傑馬房嘅「最多歡笑」，無疑季內兩戰都不入三甲，但此駒唯一頭馬正正於沙田泥地夜賽取得，鞍上人都係蔡明紹，今次形勢相若，不能忽視。

另外，馬會首席醫療主任通知受薪董事小組，表示蔡明紹今天已接受評估，確定適宜在10月23日星期三的沙田賽事恢復策騎出賽。