易主復出照贏　歌利巨人強勢攻日本盃

今年7月尾以26倍冷門身分勇奪英皇錦標嘅法國賽駒「歌利巨人」(Goliath)，已經有段時間冇上陣，由於佢係閹馬，因此未能參與早前嘅法國凱旋門大賽，亦放棄剛周末嘅英國冠軍錦標。原來「歌利巨人」揀咗尋日喺法國隆尚馬場復出，出戰2200米二級賽巴黎市議會大賽，即使缺陣近3個月，仍喺蘇銘倫胯下順利掄元，以半馬位之先擊敗「恰妙事」(Hamish)。

「歌利巨人」今場轉咗綵衣，因為美國馬主John Stewart早前購入此駒75%股權，佢尋晚更喺美國飛去法國睇愛駒演出，見證馬兒順利連捷。賽後練馬師葛威法話今場頭馬難度唔低，因為要孭重磅，贏埋今場之後，就會遠征日本角逐日本盃，而「歌利巨人」嘅原本馬主亦認為日本競爭固然激烈，但今年水準未必及得上往年，佢相信今屆外隊有機會揚威日本盃。