首派K布馬上陣　游達榮「開」門見山

從澳洲毅然隻身來港設廐的游達榮，事先張揚要先為馬匹打好底子，不會急於出兵，難怪頭一個月冇馬出，其後練者逐步派馬上陣，好快便憑「駿步騰飛」開齋省招牌，證明呢招係work。周三全泥夜宴，游廐派3駒參戰，當中第7場三班泥地1650米更雙龍出海，以「好好心得」與「開心五月」夾攻，後駒為馬房首匹上陣的K布新馬，可視為練馬功力的指標，不妨拭目以待。

今早最後試跑課期，游廐3匹參戰馬天未光已瞬即分別由助手代勞，於大圈進行試跑考驗，特別於5時正，「開心五月」由助手快跳兩段後，見游達榮急急腳折返機坪隧道口，恭迎人馬歸來，繼而猛向鞍上人追問操後感，緊張之情表露無遺，此駒賽前兩課泥閘拉士都有追勢，肯定操好才出，不容低估！