今早兩單落樓　袁幸堯執番自己隻錶

行船跑馬三分險，昨日尾場蔡明紹策「九因歌」途中被拋下，鏡頭頗驚險，豈料未夠半日，今早又發生「落樓」意外，猶幸人馬俱無大礙。首先，約6時15分，跑道耙地後剛重開，姚廐未命名新馬K183於內圈起步時，懷疑興奮得滯，不斷擰頭擰髻，鞍上的助手冷不提防被拋下，吉馬走甩一個圈，期間幾乎與兩匹廐侶撞個正着，最終要由兩匹儀仗馬夾擊，終在馬房彎附近收停，再被工作人員捉回。

至於另一單「落樓」意外，主角係巫廐的新馬「手機錶勝」，今早由暫時返港受訓、等待再往海外出賽的見習騎師學員袁幸堯於大圈出跳，惟課後調頭落斜路時，懷疑前方「塞車」，馬匹突然起擒，鞍上人頓失平衡被拋下，但堯妹勝在臨危不亂，千鈞一髮之間瞬即起身，繼而一手捉番實隻「手機錶勝」，身手堅敏捷，然後笑笑口牽引馬匹返機坪，化險為夷。