一拍即合　鄭俊偉同Win神繼續增添勝利喜悅

鄭俊偉今期屯重兵，再次派出佢大旺嘅「8」字陣勢出擊，跨季一次出馬8匹例贏格局，今季喺9月28日賽事，更加取得1冠1亞2季1殿成績，可以講係連場搏殺，所以對於呢晚泥地夜賽，睇嚟米高都係躊躇滿志。

以今期全泥夜賽，鄭俊偉又有新鮮配搭，搵到小妹騎「帝豪歡星」減磅出擊，其實以佢上周三喺夜賽同何澤堯久違嘅合作，由於楊明綸停賽關係，造就兩位重新撻着機會，先贏「木火龍駒」，另一匹「新力」都跑第4，呢次強勢部署，亦有頭場「喜悅一生」再度合作嘅機會。

雖然「喜悅一生」今季喺田泰安跑過兩場表現一般，但初出跑嫌短嘅泥地一哩後上跑第4，亦證明呢匹馬泥地性能可恃，來港唯一頭馬正係上季取勝於泥地1800米，今次重返勝途，一於換人一試，又睇吓騎練能否食住度勢，再次擦出勝利火花。