盡顯真功夫　廖康銘成績好絕非僥倖

廖康銘開倉第二季，馬房成績蒸蒸日上，唔單止係質新馬，就連暑期接手嘅現役舊馬，正如成功連捷嘅「上校」，以至喺星期日飛到馬到嘅「愛心神駒」，省到個招立立靚，凡事最怕有比較，比起開倉第3季嘅黎昭昇，孰優孰劣，相信馬迷自己有答案。

相信現階段對於廖康銘嘅練馬功力如何，都應該唔會再有任何懷疑，已經連續兩期賽事起孖，今次移師泥地夜賽，一再喺泥地賽事有出色表現嘅「精英雄心」，力謀補中睇怕都難逃大熱門命運。

不過捧廖康銘嘅馬，勝在冷熱不拘，操弗嘅一定全力以赴，所以今期賽事，仲要敲住冷殺手霍宏聲幫佢騎嘅兩件，「儀琪之寶」喺谷草屢拚不逞，今次轉泥一試，以佢過往試泥閘都有唔錯走勢，擺明轉場求突破。

仲有今季先至加盟嘅「果然僥倖」，今季喺上一手跑咗場田草1200米，尚且輸唔遠，以目前評分，草地跑落又唔算太突出，轉倉首戰廖康銘安排佢轉跑泥地一試，話唔定人氣沒法擋，「果然僥倖」今場轉戰泥地，試出彩虹一啲唔奇。