騎得開心　薛達祺日本客串延長兩個禮拜

日本中央競馬會公布，目前於當地策騎嘅德國冠軍騎師薛達祺，客串期將會延長兩星期，原本佢嘅客串期係由9月21日，直至11月8日止，依家就會續住落去，有效期直至11月22日。

雖然比起剛剛星期日單日6捷嘅杜滿樂，薛達祺風頭肯定比下去，但對於呢位50歲德國冠軍級人馬，始終係老而彌堅，截至剛周日賽事，佢響今次重臨JRA客串，已經累積6W，而且極受當地馬圈歡迎，取得唔少支持。

薛達祺響日本策騎以來，就仲未有機會贏過一級賽，今次延長兩個星期客串，正好可以跑埋女皇伊利沙伯二世盃，同埋一哩冠軍級兩項重要G1，睇吓佢又可唔可以把握機會，響日本成功衝擊G1，而嚟緊星期日六、日打疊賽期，薛達祺就會分別響京都競馬場同東京競馬場披甲。