安仔700W先到先得？

田泰安尋晚谷戰表現麻麻，佢坐騎「建測羣英」入直路前幾乎拋跌咗佢，最終更被罰不小心策騎要停賽1日，認真慘情。嚟緊周日沙田賽事，安仔就有8匹坐騎，實力唔算太差，而佢在港已累積698場頭馬，只要再添2W就達700大關，相信會盡力完成呢個目標。

其中頭場五班田草1800米嘅「樂天派」，呢匹7歲馬開鑼日喺田泰安胯下爆冷跑第2名後，對上3仗先後用潘頓、湯普新都表現一般，今次重配安仔，埋門亦有拍跳工夫，配合2檔好位，隨時可以變身。至於第5場由蔡約翰訓練嘅「先到先得」，今季復出先喺田草1200米追得好，剛戰增程跑1400米再次後上跑第5名，落後「堅闖」3個半馬位，今次賽前安排由安仔試咗課1200米泥閘省起狀態，再攻此程配合輕磅優勢，隨時為佢帶嚟第700場勝仗。