【分秒在握】連環發射威力強

鄭俊偉今季有個好開始，跑了兩個月已取得6W，亦即是接近達標14W的半數了，由於練者作風正派，因此亦受到不少普羅馬迷的支持。查看鄭廐季內6場頭馬，分別由6匹不同賽駒取得，亦即是季內暫時未有連捷馬，不過鄭廐贏完再出的「領航傳祺」及「年年友福」分別跑亞、季軍，雖然未能冧莊，但馬房勇往直前的作風未有改變。

來到今次，鄭廐可以話精銳盡出，總共有7駒列正選，除了上文提及的「領航傳祺」外，亦有新勝而臨的「威力飛彈」及「愛馬善」，其中「威力飛彈」上仗以7歲之齡取得久違了的頭馬，今次由五班回升上四班，真的有能力克服嗎？五升四班，從來都不易克服，尤其係短途賽，四班充滿了潛龍伏虎，要一下子把這批質新馬殺敗，的確要有相當本事。

上仗「威力飛彈」出爭五班田草1200米，遇上了超慢步速下，一直跟守第4位，入到直路一望空之下，馬匹即加速追前，末段愈走愈勁交出22秒正衝刺，流鼻血陰影一掃而空。今次升班負117磅周俊樂未能造磅，因此換上潘明輝，後者當旺兼同鄭廐有交收，信有能力再衝贏。

■長風