【世界觀】名馬主勁推攻守有道

曾7奪錦標、墨爾本盃史上最成功嘅大馬主Lloyd Williams，因為名下賽駒未能通過獸醫檢驗，20年來首次缺席呢項大賽。雖然無馬參賽，但呢位澳洲賽馬界巨人亦分享佢對今屆賽事嘅睇法。Lloyd Williams認為「攻守有道」機會最突出，佢話莫威利係一位出色練馬師，吸取過舊年失敗經驗，今屆賽前作出針對性部署，其中安排比上屆更遲抵達澳洲係最正確做法，另外鞍上人布宜學響啱啱嘅美國育馬者盃演出着晒火，都有助呢匹馬交出唔同嘅表現。

至於另一匹奪標熱門「實幹牛仔」，Lloyd Williams話匹馬響歐洲仲係BB嗰陣已經見過，可以講係由細睇到大，佢認為匹馬具一定實力，但係就好懷疑夠唔夠長力應付3200米，要贏似乎有難度。