【晨課起筷馬】草閘加眼罩　衝刺力凌厲

第6場四班1200米，伍鵬志馬房「江南盛」上季尾落五班贏馬後，今季復出在四班3戰俱三甲不入，表面看來是力有不逮，但其實連場遇上不利形勢而敗，不足為據。其中上仗田草1200米，「江南盛」輸畀「佳運發」跑第6名，該役亞軍「勇冠群英」剛周日已補中，身後「川河首駒」上周都贏埋、「加州得力」亦可以上名，話佢出自強組賽事亦不為過。

「江南盛」上賽後即運返從化休息，抖咗一星期養回體力後，即時有快跳操練，隨即響從化試咗鋪閘，嗰課草地1200米加眼罩，並由見習學員出試，起步後即拖實留在馬群尾疊，同主馬群更有脫節距離，沿途紋風不動，直至入正直路，鞍上人開始作催策，馬匹逐步加速終點前僅越過一駒，不過甫過終點嗰段衝刺力卻相當凌厲，響外疊逢馬過馬，勁度十足，直情有拉唔住之感，呢個眼罩幫到手喎！

■陳志懷