騎而優則練　巫斯義從練首W即贏表列賽！

巫斯義從練首場頭馬片段：

https://tinyurl.com/56ke8pwt　

巫斯義呢個名字，相信冇咩馬迷冇聽過，呢位已經57歲但近年仍於歐洲馬壇相當活躍嘅名將，今年終於喺騎師崗位退落嚟，轉任練馬師，向另一個階段進發。雖然開倉日子唔算太久，但唔少人都等緊究竟佢幾時攞到從練首W，結果尋晚喺法國聖格盧馬場，佢憑黎敏滔策騎嘅「壯麗星」(Grand Stars)以32倍冷門身份攻下表列賽隱逸錦標，從練首場頭馬即贏表列賽，認真犀利。

其實「壯麗星」早前才由巴托里寧馬房轉往巫斯義馬房，估唔到轉倉首戰就有咁大進步，喺呢場表列賽大炒紀仁安嘅大熱門Galaxie Vega 4個馬位，非常誇張。巫斯義賽後先大讚鞍上人黎敏滔發揮出色，同時認為尋晚嘅變化地對馬匹有極大幫助。

至於問到有否為幾時攞到首場從練頭馬感到壓力時，巫斯義就話自己冇呢啲感覺，佢當然興奮「壯麗星」能夠順利勝出，但今場賽事目的希望令馬兒交出晨課嘅水準，而馬匹亦確實做得到。