長途賽搵潘頓　韋達要同大將交代

潘頓、韋達都算係近代香港馬壇最有影響力嘅騎師，喺韋達騎師生涯中後期同潘頓鬥得非常燦爛，依家韋達轉任練馬師，即使同潘頓合作次數唔算太多，但對啲真係搞唔掂嘅賽駒，都會搵到呢位冠軍騎師幫手，成績唔差。此外，呢對騎練喺1800米或以上嘅中長途賽事攜手出擊10次，攞到1冠4冠2季，上名率有7成，都算幾穩陣啦。

而喺聽晚跑馬地賽事，韋達就將今次降至五班跑谷草1800米嘅「大將」改用潘頓掛帥，睇怕都係想交代贏番場啩。呢匹「將王」同主馬都預咗比較遲熟，上季出道後等到季尾先開始有表現，7月初喺谷草1800米入Q，只係輸畀「春風萬里」，今季復出後跑咗兩場，可惜都係梗頸四，結果獲減2分跌至40分，可以落到五班上陣，立即搵潘頓執韁，而今次韋達亦刻意讓此駒返回從化操練，或者想增加新鮮感。話晒「大將」近期喺四班成日跑近，今次面對較弱對手，點都有啲着數，睇吓能否順利先拔頭籌啦。