浪漫勇士遠征先草後泥　沈集成提早抵杜拜迎接馬王

香港馬王「浪漫勇士」目前最大目標係力爭香港盃3連霸，幕後除咗想完成呢個壯舉，兼打破「金鎗六十」全球累積獎金最高賽駒紀錄之外，對明年嘅遠征計劃已有周詳部署，主要目標係2月尾嘅沙特盃同埋4月初嘅杜拜世界盃賽期。沈集成早前透露打算先讓「浪漫勇士」喺杜拜進行一場熱身戰，兼且已報跑明年1月24日於美丹馬場舉行嘅1900米泥地G1麥通挑戰賽，似乎想先測試馬匹泥地性能。

不過，沈集成今朝表示部署已有改變，由於馬主劉栢輝先生並唔希望愛駒喺杜拜首戰即跑泥地，故已安排轉爭1月24日1800米草地一級賽傑貝哈特錦標，然後直接跑沙地1800米嘅沙特盃。

沈集成透露已安排「浪漫勇士」12月17日離開香港前赴杜拜，而佢就會提早於杜拜等待馬王抵達當地，因此不會於12月15日嘅賽事督師，而由於杜拜世界盃賽期將於明年4月5日上演，意味着「浪漫勇士」至少離港4個月。沈集成話馬房團隊會有大量準備工夫，務求做到最好。