試完大閘缺課3日　葉楚航話大至尊無問題

上季打吡冠軍「大至尊」，今季復出角逐1800米G3婦女銀袋賽只得第6名，然後並無安排上陣，就直指下個月嘅2000米G1香港盃。啱啱禮拜二葉楚航安排此駒試咗課1600米草閘，由潘頓親自考驗，結果率先衝線。不過，自從試完大閘後，「大至尊」連續3日都無蒲頭，直到今朝先安排於機坪踱步，莫非馬匹備戰期間出現小狀況？

葉楚航今朝都有同《東網》馬經記者講吓「大至尊」備戰情況，佢話呢匹打吡冠軍並無咩問題，今朝已經出返嚟機坪踱步，佢亦對馬兒早前試閘走勢感到滿意。另外，「大至尊」上仗婦女銀袋嘅演出似乎略遜預期，但嗰場賽事步速比較奇怪，中段突然加速，「大至尊」被掟開一段距離，形勢非常惡劣，即使已嘗試造唔錯反速也難以收復失地。不過，今場香港盃對手極強，航哥話會盡力而為，亦係測試「大至尊」能力嘅最佳機會。