【晨課起筷馬】抖夠、磨利　首本路程開光啦

第4場四班1200米泥地，徐雨石馬房「八心八箭」至今15戰尚未出頭，馬匹本身健康唔穩定，上年8月份因心律不正推遲上陣後，跑至2月份又因左前腿管骨受傷而長期缺陣，可以話多災多難。

雖然體質比較弱，但「八心八箭」本身具不俗質素，因此陣上演出一直唔會脫節，尤其係跑泥地1200米，8戰獲2亞2季，曾以大半身位負於當打之年的「晶晶日上」而壓倒「閃電」，單計呢場賽績，又點會留到喺四班？今季復課以嚟，雖然操練上都唔敢用太大力度，順其自然咁操，不過馬匹亦相當受落，狀態逐步回穩。

上月中安排試咗鋪田泥1050米閘，「八心八箭」全程以輕鬆姿態跟放而回，過終點後餘勢遲遲未停，勁到有啲唔似真，完全唔似一匹有過傷患之馬。試閘後繼續有正常操練工夫，狀態方面不用懷疑，今仗復出即揀首本路程，兼配唯一10磅生黃寶妮，畀佢放到出嚟要追唔係咁容易，大有機會克服陰影敲響勝鼓。

■陳志懷