【露露通】賀銘年旌鷹破悶局

貝知仁將於今期起在港客串兩個月，呢位年輕好手剛周五首日出席晨課操練馬匹，感受一下香港賽道。貝知仁只係24歲，但佢今年喺法國成績只僅次於紀仁安、巴米高之下，難怪唔少人都認為佢係明日之星。貝知仁雖然英語能力一般，但佢都盡力探索香港環境。畢竟12月先到香港，貝知仁今期坐騎實力未見突出屬正常事，然而佢兩位同鄉巴度同賀銘年繼續失蹤人口。

今期日賽，兩位法國好手各有餐士馬，其中巴度所策第4場「澳華威威」今季喺泥地未失獎金，狀態保持得好，只要場地利後上，隨時有利此駒扳回一仗；另外賀銘年第8場騎「旌鷹」上陣，此駒上仗增速需時，但撻着末段締速甚佳，此駒本身在港贏過泥地，性能毋須懷疑，出閘後搵到遮擋跑，有權直搗黃龍。