見習學員黎彥麟南澳傳捷報

目前於南澳學藝嘅黎彥麟，今日拆禮物日於當地萬富圍園(Morphettville Parks)上陣，再次交出頭馬，全日只跑3場，首匹坐騎已經開胡，全日取得1冠1殿。

原本今日佢有4匹坐騎，不過頭場坐騎退出，由第3場開始上陣，即刻先聲奪人，於1000米3歲指標評分64讓賽，夥拍練馬師何萬滔旗下馬匹Dyer，憑藉1檔之利，起步初段已經搶佔放頭位置，就此一放而返。

第2匹坐騎The Indigo Falcon響第5場賽事，雖然無乜走勢，11駒只跑尾二，接住第7場賽事再傳捷報，呢場係1250米特別條件讓賽，黎彥麟策騎由Bill Bogarts訓練嘅5歲馬Sniper Nightmare，又想故技重施靠放食胡，但坐騎臨門力弱，只跑梗頸四。

黎彥麟上月於南澳策騎成績唔錯，頻頻有馬贏，不過踏入12月就久久未贏馬，最叻都係跑過幾場位置，今日終於取得12月首勝，總算打破近期小悶局。