呢位澳洲鄉里　做咗希斯新秘密武器？

昨晚希斯多匹熱門馬倒灶，其中「赤馬雄風」輸條頸，認真欠運，須知馬房已4期冇馬贏，絕對要諗吓計仔破悶局，否則練馬師榜前列位置隨時不保。周日沙田賽事，練者一於搞搞新意思，一口氣將「武林至尊」、「風雲武士」、「悠悠乾坤」及「志滿同行」交予頻有冷門入圍的湯普新執韁，冀能變出彩虹，而今早騎練亦按捺不住露出搏殺手影。

6時左右，希斯安排週初才由從化運返的「武林至尊」，由湯普新首朝過檔，並於大圈快跳400米，馬匹走勢勁如炮彈，鞍上人幾乎捉路唔住，充滿新鮮感。課後，練者隨即走到機坪接馬，並吩咐湯普新不要落馬，直接騎返馬房，看來想刻意加強人馬溝通，動態殊不簡單，此駒今戰回爭季初首仗，錄得全場最快拉士的田草1400米，且看騎者能否省起其強橫後勁，助希廐重遊勝利道？