衞冕華商會盃　艾兆禮棄神虎揀隻鷹？

今屆國際三級賽華商會挑戰盃，11匹參戰馬中，其中6件都係上屆嘅參戰賽駒，當中包括今季繼續掛頭牌嘅「加州星球」，去年喺呢項賽事大熱倒灶跑包尾二，不過更值留意嘅就係力爭衞冕嘅伍鵬志，今次雙龍出海，但係上屆盟主「神虎龍駒」由何澤堯出戰，原先嘅贏馬拍檔艾兆禮，竟然騎咗廐侶「飛鷹翱翔」。

以「神虎龍駒」上季連勝1400米嘅表現，被大幅加咗21分，似乎呢個升幅遇上樽頸位，要到季尾落到一班靠黃智弘減磅至再贏，踏入今季除咗首場喺對手較弱嘅G3慶典盃跑過第2後，回配艾兆禮再次衝擊高水平分級賽，又成陪隊分子，相比之下，今場同屬三級賽，但對手比起季初強咗好多。

反而「飛鷹翱翔」上季接受完右後蹄球節手術之後，今季一出即刻爆冷，就算上場跑第4，排14檔於二班強組4駒同到下，都係僅以3/4馬位僅敗，既然今場G3跑讓磅，計落輕磅優勢搭夠，又未必無得跑，唔好忘記，季初贏馬之役，蹄下敗將正係今場熱門之一嘅「手機錶霸」，有埋呢個賽績加持，各位點睇？