只贏新加坡四班　評67分合理嗎？

新加坡賽馬結束後，最近有唔少來自星州嘅賽駒來港服役，聽日第8場三班田草1200米嘅「競駿先鋒」正係其中之一，此駒上季初出即贏後，今季亦贏咗場三班田草1200米，成績唔算差。今次同場就有另一匹來自新加坡嘅PPG，就係希斯訓練嘅「艾彼奧」，評67分插入三班，究竟能否好似「競駿先鋒」交出好成績呢？

同「競駿先鋒」喺新加坡1戰即勝就來港唔同，「艾彼奧」喺星州已經有豐富出賽經驗，11次出賽取得2冠2亞1季，曾經4度與同樣來港嘅新加坡賽駒「豐盛」同場，4次都唔夠後駒跑，但「豐盛」只評69分插班，而「艾彼奧」卻評67分，況且後駒來港前最後一仗只係贏當地嘅四班賽事，呢個評分會唔會略高呢？