【晨課起筷馬】從化試閘為今鋪做好準備

第7場二班1400米草地，競駿會盃，希斯馬房「球星」歷來15戰獲4冠3亞5季，由四班逐步贏上嚟，雖然評分正處歷來最高位，但季內贏馬可以視「天天同樂」如無物，幾可肯定仍有進步空間。上仗出爭田草1400米亦只以頸位敗於「包裝天將」獲亞，身後「潮州精神」及「飛鷹翱翔」隨後已向三級賽進軍並取得好成績，反映賽事水準之高，以現時評分肯定仍有上升空間。

「球星」今仗再向二班賽進發，形勢上相當有利，首先上賽後做足操練工夫，快跳、慢踱例課無缺，月初喺從化馬場試多鋪1200米草地大閘，雖然只以第7名過終點，但全程無點騎過之下，沿途走大外疊蝕盡腳程，仍以輕鬆姿態完成，而過終點後餘勢更遲遲未停，狀態勇銳毫無疑問。

除配件試閘有部署

此外，「球星」該課閘刻意除去所有配件出試，睇番上賽重戴羊毛面箍憑新鮮感加強戰鬥力，對馬匹有正面幫助，可見該課閘除去配件係為今仗帶來新鮮感做好準備，用意向好，重配贏馬拍檔艾道拿，值得看高一線。

■陳志懷