【露露通】納百川田草都得

今期沙田日賽，黎昭昇只有1駒正選列陣，就係第2場打王牌嘅「高感」，而黎廐今期只為此駒打王牌。睇番報名表，第1場五班1200米泥地「欣感」列作後備2，呢場最後只得「友誼至佳」係冇王牌同冇保護權下列作正選。呢組賽事如果「欣感」有打王牌，相信可獲正選出賽。睇番賽期表，再有五班1200米泥地就要等到2月12日，心意如何就只得幕後先知了。

部分練馬師當然盡量想報名馬都可全數獲正選，畢竟操起狀態，梗係跑落先見真章，有份跑就有機會爭獎金，但都有拎保護權，所以唔啱路程都會照報名一搏，從觀察所看，唔難明白點解有啲馬迷連報名表都刨埋。

第10場三班1600米草地，新勝「納百川」上季田草1400米後追跑入第5，證明田草同樣可應付，升班轉場有分頭仍值博。