【大跑道】旺旺快駒火箭咁快

周六朝有兩匹參戰馬到大圈出試，同樣由助手踱一圈，「金鑽精靈」仲有少少急口，未夠放鬆，大馬尚有收身空間；「陽光勇士」一貫生猛要緊韁鎖實，身壯毛色金光閃閃，好吸引。以下是心水推介：

第1場「漣心星」前仗唔再慢閘並擺到前走，上仗出閘唔慢，卻刻意拖後留以有待，今仗落班是目標所在。「漣心星」今番抖個半月且操足，賽前再一次上從化備戰，最近試閘更變招搶放，試準性能。

第4場「旺旺快駒」前仗久休復出後上跑近，上仗早段被頂結果焗住留後，入直路更受阻輸得唔抵，今仗再次戴上眼罩不容有失。剛周四與退役馬拍跳，戴上眼罩的「旺旺快駒」好似支火箭咁快，僅僅衝200米就將退役馬拋離成條街。

第9場「但求開心」上仗若非慢步速，加上蔡明紹首度出策末段外閃，早就寫下3連勝佳績，今仗回配贏馬拍檔梁家俊人馬合拍，更吸引係剛周四出跳既輕身且神閒氣定，比前再進一步。