首飾天空抽11檔 蔡約翰都覺得唔易應付
2025年02月04日 15:27
東網電視
更多新聞短片

第3場四班1200米「首飾天空」上仗一出即勝。
今季蔡約翰回復神仙本色,現時以26場頭馬站穩練馬師榜前列位置,新馬進度接得上,當然係蔡廐成績回勇主因,今季蔡約翰唔少新馬進度來得甚好,其中今期跑馬地夜賽,列陣第3場四班1200米拆組賽事嘅「首飾天空」,上仗喺布文胯下展現凌厲後勁一出即勝。今次「首飾天空」新勝後再出,抽得11檔,對於一匹出賽經驗少嘅賽駒而言,自然有難度。
蔡約翰今日(2月4日)接受訪問時就話,「首飾天空」未出賽之前已經覺得佢有實力,結果上仗初出即展現能力取勝,可見此駒適應得唔錯,而佢上仗賽後回復得好,現時狀態唔錯,感覺佢仍有進步空間。今次「首飾天空」抽11檔起步,需要消耗體力先擺到好位,所以唔易應付,今仗亦都唔會有對手幫佢賺形勢,「首飾天空」需要憑自身實力克服難度。
「首飾天空」1月24日試過從化閘,當時可跟前競跑,蔡約翰認為,此駒可因應檔位改變跑法,佢可以守番啲機動位置,日後可跟前跑亦不足為奇。