【耀眼精選】妙算奇勝進步神速

2025年02月04日 23:30
東網電視
更多新聞短片
霍宏聲今季同廖康銘拍住上,響啱啱嘅年初三賀歲賽更攜手迎來在港最重大勝利,憑「祝願」勇奪4歲系列賽頭關經典一哩賽。今期呢對好拍檔繼續大手交易,廖廐6匹參戰馬5駒配上霍宏聲,當中「上校」今季呈迴光勇,返回谷草主場又有機會帶到;「超勁火力」遲熟馬終於開竅升浪應未止境;「年少多好」對上3仗均入位,已站在取勝邊緣;「駟跑得」季內5戰縱敗亦不遠,跑出水準,有機繼「駿跑得」後再替馬主建奇功。
上述4駒均係正路牌面馬,不過結合賠率,筆者反而對呢對組合嘅「妙算奇勝」最感興趣。呢匹J布大冧把馬響舊年12月底登場,出戰難度極高嘅田草1400米,輸畀「嘉應奇兵」、「準輝煌」同「至尊高超」呢3匹潛力新星5個馬位, 表現一啲都唔差,而且「妙算奇勝」出閘後不久便失蹄,直路持續內閃,接近200米左右處更逼近「肥仔精神」後蹄難望空,意外多多。
「妙算奇勝」出自中長途種馬「一錘定音」,增程跑1800米更合血統性能,賽前兩試1600米閘練氣之餘,更刻意留後教馬追趕,上月20日一課由原本貼欄拉到出九疊,離開對手兩個橫身位衝,走來規矩得多,過終點更過晒,質新馬進步一日千里,轉跑谷草中長途可展露真正能耐。