相隔12年 南非著名練馬師申請復牌

2025年02月05日 13:05
東網電視
更多新聞短片
南非著名練馬師布學文,相隔12年再次申請開倉。
南非著名練馬師布學文(Herman Brown Jr.),於2013年放棄從練,在相隔12年後,再次申請復牌,並已獲得南非賽馬會成功批核,下周起正式生效。
對於布學文,香港資深馬迷唔會陌生,早於2006年已經派出「凌駕力」出戰香港一哩錦標跑5,其後亦有「西國浪人」、「滿利恩」先後征港,從練最出色一駒,要數「精闢圖像」(Jay Peg),曾經取勝新航國際盃與杜拜免稅店盃,而且更係首位南非練馬師,於2009年澳洲墨爾本盃憑「滿利恩」,取得最佳成績,跑獲季軍。
布學文從練期間與郭克同屬南非馬匹遠征先軀,兩人當年更於杜拜設有衞星馬房,可惜其後南非馬匹檢疫程序受到嚴格限制,馬匹遠征海外機會欠奉,令布學文放眼海外計劃大受打擊,意興闌珊下決定棄練從商,但亦不忘以馬主身份參與賽馬運動,然而去年宣布南非馬匹出口程序獲得解封,亦令佢重燃復牌意向,經過詳細考慮,終於入紙申請復牌。
隨着當年放棄牌照,已將位於德班原有馬房,交與當時其副練身份,現已獨當一面嘅羅賓森(Frank Robinson)接管,因此布學文復牌之後,將會移師開普敦,繼續其練馬師生涯,初期養馬量將維持在30匹左右。