【戰況R1】梁家俊停賽被爆樽　班德禮父母來港有馬贏！

今晚蛇年首次谷草夜馬，賽前見到班德禮父母嚟咗馬場，結果頭場即刻有馬贏呀~第1場五班谷1650米，直路馬群散開鬥後，大外欄黎廐大熱門「焦點」追勢好勁，以為贏得喇，點知班仔騎住巫廐上次第6的「閃亮老撾」在馬林內欄穿上來，就係慳多少少，結果壓線啄贏，呢隻之前幾仗都係梁家俊騎，但騎者今日停賽換上班德禮即刻建功，至於跑第3、4名則為放頭的「冠寶駒」及6倍半熱門「着着領先」。

贏到第23W嘅巫偉傑，話「閃亮老撾」血統都係跑短途為主，但晨課見佢均速同大步，跑短途路程可能冇咁好，所以就為佢增程一哩，前仗開始加戴開縫眼罩想佢集中啲，上場出閘慢咗，今次都吩咐班德禮出閘要快啲，保持位置，入直路伺機而動，加上有個1檔，終於為馬匹打開勝門。

第1場賽果：4-8-5-11

二重彩賽果：4-8(最後賠率54)