东网电视
更多新闻短片
马会下季初会唔会为“嘉应高升”增设一场平磅赛呢？
上期专栏讲到目前香港马坛三强，有啲读者可能觉得笔者似乎有啲睇低“嘉应高升”，觉得就算呢匹短途王可能系唯一季内8战全胜嘅佳驷，喺马王选举入面都争唔赢今季输过嘅“遨游气泡”及“浪漫勇士”。笔者只能讲绝对冇唔尊重“嘉应高升”嘅成就，甚至如果问笔者，“嘉应高升”同前传奇短途王“精英大师”、“莲华生辉”比较，都绝不输蚀，甚至讲竞赛能力，应该更胜一筹。只系面对一匹可能海外3胜G1，另一匹就系潜在嘅香港三冠马王，输蚀啲都好正常。除非“嘉应高升”想挑战澳洲珠穆朗玛峰锦标喺今季举行兼畀佢赢埋啦，咁就真系有故讲喇。
讲起珠穆朗玛峰锦标，呢场总奖金达2000万澳元嘅1200米一级赛，从未试过有香港马参战，但香港马主何家驹就靠名下嘅“川河达驹”赢过一次。其实以香港顶级短途赛驹嘅能力，就算远征澳洲，一样可以跑得近。但珠穆朗玛峰锦标嘅性质比较特别，要买位先有机会参与，只不过早几年有出赛资格嘅持份者有搵过当时嘅短途三冠王“金钻贵人”，有冇兴趣远征澳洲，只系最终未能成行。不过，自从赢完上场女皇银禧纪念杯后，听希斯嘅口气，只要“嘉应高升”健康无问题，下季初即系今年10月中就会远征澳洲出战此场1200米G1，即使马主冇畀钱买位，但希斯一早讲咗好多拥有出赛资格嘅单位已经搵咗佢，想“嘉应高升”代表佢哋参战。
可能有人觉得距离仲有8个月，到时发生咩事都未知啦，只系“嘉应高升”嘅练马师系希斯、骑师系潘顿，呢对澳洲骑练点会唔想返澳洲赢大赛，所以单论决心同诚意，笔者觉得唔使担心，同埋沈集成都讲过“浪漫勇士”跑完今季应该唔会再远征，如果想睇到香港佳驷下季扬威海外，“嘉应高升”应该都最大希望啩。
不过，笔者最近睇咗啲报道，希斯想“嘉应高升”远征澳洲前喺香港有一场热身，但就唔想只马孭135磅咁辛苦，觉得马会系咪应该可以喺季初整一场平磅赛，又或者好似马会短途锦标呢类有条件嘅限磅赛呢。即使未出下季赛程，但只系参考近几季嘅情况，一匹评分逾120分嘅短途好手如果想季初上阵，只系得开锣日嘅一班1200米特首杯可供选择，而“嘉应高升”今季正正都系以特首杯作为复出战，结果都系孭135磅建功。所以如果“嘉应高升”想热身，唔系冇选择。
至于马会刻意整一场热身赛，唔系冇先例，讲紧喺1994年9月中，马会刻意安排咗一场2300米一班赛畀之前嗰场终于做到三冠马王嘅“翠河”参与，作为呢匹长途好手远征澳洲跑觉士盾及墨尔本杯前嘅热身，最终呢场2300米大长途赛事只得4驹角逐，而“翠河”亦要孭135磅，结果大炒亚军“玉峡生辉”5个几马位。所以如果问马会，可能佢哋觉得既然有特首杯，系咪有需要再整多一场平磅短途赛？始终高分马唔多，但如果将特首杯变成系二班田草1200米，另外加一场平磅嘅1200米分级赛喺季初，畀“嘉应高升”唔使孭重磅跑，又有无可能？始终肯远征嘅香港马，都叫为港争光，为佢哋谂多少少，都合理嘅。
■山无陵
