【分秒在握】反敗為勝得天下

艾兆禮剛周三停賽期滿復出，立即成功起孖，更差一點就勝出騎師王，表現可謂相當爭氣，來到今次賽事，騎者共有7匹坐騎，其中第9場三班1400米的「樂勝天下」就值得優先留意。此駒今季方出道，除首仗跑谷草1000米外，之後一直主攻田草1200米，而且更曾經殺入亞軍，不過跑落未能突破之下，上仗初次挑戰1400米，結果跟前之下追回第3，僅以四分三馬位負於今次再同場的「至尊高超」，而「樂勝天下」由負磅相同之下，變為今次受讓6磅，計數已有權反先。

其實上仗的1400米步速不慢，首1000米造57秒8，比標準時間快了足足7線，而初次挑戰1400米的「樂勝天下」，既要克服增程阻力，又要面對快步速跟前，對氣量是雙重考驗，但馬匹直路拉出望空後愈追愈勁，反映目前1400米應更合發揮。今次艾兆禮再次主轡「樂勝天下」，人馬有過上仗同程入位的合作經驗後，估計留放會更佳。

■長風