綫路達飛轉跑田草　全哥解釋跌磅原因

羅富全旗下嘅「綫路達飛」初出至今一直都係跑谷草，5戰取得1冠1亞，表現尚算不錯，然而練者表示此駒需要檔位幫手：「『綫路達飛』始終年輕，有個靚檔會幫到隻馬，同埋上場略嫌留得有啲後，好彩今次抽到3檔，如果無其他馬放，唔排除會自己擺前走。」

此役亦係「綫路達飛」首次轉戰田草，羅富全表示係應馬主要求，想試吓跑沙田，相信馬匹都可以應付。而「綫路達飛」賽前曾帶羊毛面箍試過一課泥閘，全哥表示原意希望令馬兒更集中，不過試落效果麻麻，所以最後出賽都冇用呢個配備。至於「綫路達飛」對比上仗跌咗27磅，練者表示馬匹食慾、健康都無問題，只係收咗身，狀態保持水準。